မိုင်းယောင်းမြို့တွင် နိုင်ငံ့စီးပွားမြှင့်တင်ရေးရန်ပုံငွေမှ ဆီထွက်သီးနှံစိုက် တောင်သူများသို့ ရန်ပုံငွေပေးအပ်

 

မိုင်းယောင်း မတ် ၂၃

ရှမ်းပြည်နယ်(အရှေ့ပိုင်း)၊ မိုင်းယောင်းခရိုင်၊ မိုင်းယောင်းမြို့နယ်တွင် စိုက်ပျိုးရေး၊ မွေးမြူရေး၊ ကုန်ထုတ်လုပ်ငန်းများ ဖွံ့ဖြိုးတိုးတက်စေရေးအတွက် နိုင်ငံ့စီးပွားမြှင့်တင်ရေးရန်ပုံငွေ ပေးအပ်ခြင်းအခမ်းအနားကို ယနေ့နံနက်ပိုင်းက ယမ်းခမ်းကျေးရွာတွင် ကျင်းပခဲ့သည်။

ရှေးဦးစွာ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ မြို့နယ်အုပ်ချုပ်ရေးမှူး ဦးစိုးသက်ဆွေက အမှာစကားပြောကြားပြီး စိုက်ပျိုးရေးဦးစီးဌာန မြို့နယ်ဦးစီးမှူး ဦးကျော်ကျော်မိုးက ရန်ပုံငွေထုတ်ပေးခြင်းနှင့်ပတ်သက်၍ ရှင်းလင်းပြောကြားခဲ့သည်။ ထို့နောက် ဆီထွက်သီးနှံစိုက်ပျိုးသည့် တောင်သူများအား မြေပဲသီးနှံဧက ၆၀ အတွက် တစ်ဧကလျှင် ကျပ်သုံးသိန်းနှုန်းဖြင့် သိန်း ၁၈၀ နှင့်ညီမျှသော သွင်းအားစုများကိုလည်းကောင်း၊ နေကြာသီးနှံ သုံးဧကအတွက် တစ်ဧကလျှင် ကျပ်နှစ်သိန်းနှုန်းဖြင့် ခြောက်သိန်းနှင့်ညီမျှသော သွင်းအားစုများကိုလည်းကောင်း တာဝန်ရှိသူများက အသီးသီးပေးအပ်ခဲ့ကြောင်း သိရသည်။

နန်းစီဖေါင်း