ဘိုကလေး ၊ ဧပြီ ၂၂
ပင်လယ်ရေငန် ဒေသများနှင့် ဒီရေတောဒေသများတွင် ပေါက်ရောက်လေ့ရှိသည် ဓနိပင်များသည် မြစ်ဝကျွန်းပေါ် ဒီရေတောဒေသဖြစ်သည့် ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ် အောက်ဘက်တစ်လျှောက် ပေါများစွာ ပေါက်ရောက်လေ့ရှိရာ ယခုကဲ့သို့ မိုးရာသီရောက်ခါနီး မိုးကြိုကာလ၌ ဘိုကလေးဒေသထွက် ဓနိများ ဈေးကွက်အတွင်း၌ ဈေးကောင်းရရှိလျက်ရှိသည်။
ဓနိပင်များအား စိုက်ပျိုးရာတွင် ဒီရေအတက်အကျရှိသည့် ကမ်းစပ်မြေ၌ ခြောက်တောင်ခန့်ခွာ ၍ ညီညာစွာ စိုက်ပျိုးရပြီး စတင်စိုက်ပျိုးချိန်မှ စ၍ သုံးနှစ်တာကြာမြင့်ချိန်၌ ဓနိတစ်ပင်လျှင် ဓနိကိုင်း(၁၀)ကိုင်းခန့် ထွက်ရှိကြောင်း၊ ကာလပိုမိုကြာမြင့်လာပါက ဓနိပျစ်ပိုမိုကြီးထွားလာ၍ ဓနိကိုင်း(၂၅)ကိုင်းအထိ ထွက်ရှိလေ့ရှိကြောင်း ဓနိခြံပိုင်ရှင် တစ်ဦးထံမှ သိရသည်။
ဓနိလုပ်ငန်းသည် တစ်နှစ်လျှင်တစ်ကြိမ်သာ ငွေပေါ်သည့် ရာသီကုန်ဖြစ်ပြီး လယ်ယာလုပ်ငန်း ကဲ့သို့ နှစ်စဉ်အရင်းအနှီးထည့်ဝင်ရသည့် လုပ်ငန်းမျိုးမဟုတ်ဘဲ ဓနိခြံပိုင်ရှင်များအနေဖြင့် တစ်မိုးတွင်းလုံး ဓနိအရွက်၊ အလက်မွေး၍ နွေရောက်မှသာလျှင် ခုတ်ယူကြပြီး ငွေပေါ်ရသည့် လုပ်ငန်းမျိုးဖြစ်သည်။
အခြားသော ဥယျာဉ်သီးနှံများကဲ့သို့ ဓာတ်မြေဩဇာကျွေးရခြင်း၊ ပေါင်းမြက်ရှင်းလင်းခြင်း လုံးဝ လုပ်စရာမလိုဘဲ ဒီရေများနှင့် ပါလာသော နုန်းမြေများသည် ဓနိခြံအတွင်းတွင် တင်ကျန်နေခဲ့ပြီး သဘာဝမြေဩဇာအဖြစ် ဓနိပင်များကို ကြီးထွားစေသည်။
ဓနိလုပ်သားများအနေဖြင့် နွေကာလ၌ ဓနိအလက် ခုတ်ကြပြီး ရေလမ်း၊ ကုန်းလမ်းဖြင့် အဆင်ပြေအားလျော်စွာ သယ်ယူကြ၍ အိမ်သို့ရောက်သည့်အခါ ဓနိလက်များကို စီ၍ အတန်း လိုက် (၂)ပတ်ခန့် နှပ်ထားပြီး ဓနိများနပ်သည့်အခါ ဝါးကိုစိတ်ထားစသည့် နှစ်တောင့်ထွာခန့်ရှိသည့် ဓနိတံများ၌ ဓနိထိုးကာ ဈေးကွက်များအတွင်းသို့ ပို့ကြပြီး ဈေးကွက်များသို့ ရောက်ရှိချိန်တွင် ဓနိအပျစ်(၁၀၀)လျှင် ငွေကျပ်(၁၅၀၀၀)မှ (၂၀၀၀၀) ခန့် ဈေးကောင်းရရှိကြောင်း ဓနိ လုပ်ငန်းလုပ်ကိုင်သူများထံမှ သိရသည်။
မိုးစက်(ဘိုကလေး)
https://t.me/MyanmarNationalPost
No comments:
Post a Comment