နေပြည်တော် ဧပြီ ၂၁
စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် ယမန်နေ့က မန္တလေးတိုင်းဒေသကြီး ပျော်ဘွယ်မြို့ရှိ အမှတ် (၈) အထည်စက်ရုံ (ပျော်ဘွယ်) သို့ ရောက်ရှိရာ စက်ရုံမှူးက စက်ရုံဆိုင်ရာ အချက်အလက်များ၊ စက်ပစ္စည်းကိရိယာများ တပ်ဆင်ထားရှိမှု၊ လုပ်ငန်းလည်ပတ်အကောင်အထည်ဖော်ဆောင်ရွက်ခဲ့မှုနှင့် ဆက်လက်ဆောင်ရွက်မည့်အစီအမံ တို့ကို ရှင်းလင်းတင်ပြသည်။
ထို့နောက် ပြည်ထောင်စုဝန်ကြီးက ဝန်ကြီးဌာနရှိ ဝါကြိတ်စက်များကို ပြုပြင်၍ ကြိတ်ခွဲခြင်းနှင့် ချည်ထုတ်လုပ်သည့်စက်ရုံများကို တိုးမြှင့်ထုတ်လုပ်နိုင်ရေးစီမံဆောင်ရွက်ခဲ့ကြောင်း၊ စက်ရုံအနေဖြင့် ဝင်ငွေတိုးတက်ရရှိရေးအတွက် ထုတ်လုပ်ထားရှိသည့် ကုန်ချောလက်ကျန်များ ကုန်စင်အောင်ရောင်းချရန်၊ စက်ရုံမှထုတ်လုပ်သည့် ထုတ်ကုန်ပစ္စည်းများအား MSME လုပ်ငန်းရှင်များသိရှိအောင် ဆောင်ရွက်ရန်၊ ကုန်ထုတ်လုပ်မှုလုပ်ငန်းများ တိုးမြှင့်ဆောင်ရွက် နိုင်ရေး စီမံဆောင်ရွက်ရန်၊ စက်ရုံရှိ အလိုအလျောက်ထိန်းချုပ်မောင်းနှင်သည့်စက်များကို ကျွမ်းကျင် ပညာရှင်များဖြင့်ပြုပြင်နိုင်ရေး ဆောင်ရွက်ရန်၊ စက်ရုံရှိ တပ်ဆင်ထားသည့်စက်များ စွမ်းအားပြည့် အသုံးပြုနိုင်ရေး စီမံဆောင်ရွက်ရန်၊ စက်ရုံအတွင်းနှင့် ကုန်ကြမ်း၊ ကုန်ချောဂိုဒေါင်တို့တွင် မီးငြှိမ်းသတ်ရေးအထောက်အကူပြုပစ္စည်းများ ပြည့်စုံအောင်ထားရှိရန်တို့ကို မှာကြားပြီး စက်ရုံအတွင်း၌ စက်ပစ္စည်းများ တပ်ဆင်ထားရှိမှု၊ ချည်ထုတ်လုပ်သည့် လုပ်ငန်းစဉ် အဆင့်ဆင့်နှင့် ဝါကြိတ်စက်ရုံတို့ကို လှည့်လည်ကြည့်ရှုစစ်ဆေးသည်။
မွန်းလွဲပိုင်းတွင် ပြည်ထောင်စုဝန်ကြီးသည် ရမည်းသင်းမြို့ရှိ အမှတ် (၈) အထည်စက်ရုံခွဲ (ရမည်းသင်း) သို့ရောက်ရှိပြီး ဘဏ္ဍာနှစ်အတွင်း ဆောင်ရွက်မည့်လုပ်ငန်းများကို စီမံချက်များရေးဆွဲ ဆောင်ရွက်ရန်၊ ဝန်ကြီးဌာနများမှ အမှာစာဖြင့် မှာယူထားသည့် ထုတ်ကုန်ပစ္စည်းများကို အချိန်မီပေးပို့နိုင်ရေး အလေးထားဆောင်ရွက်ရန်၊ ၂၀၂၅-၂၀၂၆ ဘဏ္ဍာရေးနှစ်အတွင်း ဆောင်ရွက်မည့်လုပ်ငန်းများကို ကြိုတင်စဉ်းစား၍ အစီအမံများရေးဆွဲထားရန်၊ ကုန်ထုတ်လုပ်မှုလုပ်ငန်းများ စဉ်ဆက်မပြတ် ဆောင်ရွက်နိုင်ရန်နှင့် ကုန်ချောများ တိုးမြှင့်ထုတ်လုပ် နိုင်ရေးအတွက် လိုအပ်သည့် စက်အရန်ပစ္စည်းများကို ကြိုတင်ဝယ်ယူဖြည့်ဆည်းထားရန်နှင့် စက်ရုံတွင် တပ်ဆင်ထားရှိသော စက်ပစ္စည်းများကို ကျွမ်းကျင်ပိုင်နိုင်စွာ ပြုပြင်နိုင်ရေးအတွက် သင်တန်းများဖွင့်လှစ်ပေးရန်တို့ကို မှာကြားကာ ကုန်ထုတ်လုပ်မှုလုပ်ငန်းများ ဆောင်ရွက်သည့် လုပ်ငန်းစဉ်အဆင့်ဆင့်ကို လှည့်လည်ကြည့်ရှုစစ်ဆေးခဲ့ကြောင်း သိရသည်။
#News
Join - https://t.me/MyanmarNationalPost
No comments:
Post a Comment