ပင်းတယ ဧပြီ ၅
ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်၊ ကျုံးကျေးရွာအုပ်စုအတွင်းရှိ အခြေခံပညာနှင့်စက်မှု၊ စိုက်ပျိုး၊ မွေးမြူရေးအထက်တန်းကျောင်း (ကျုံး) ကျောင်းဆောင်သစ် လွှဲပြောင်း ပေးအပ်ပွဲအခမ်းအနားကို ယနေ့နံနက် ၉ နာရီက အခြေခံပညာအထက်တန်းကျောင်း (ကျုံး) ၌ ကျင်းပ ပြုလုပ်ခဲ့ရာ ဓနုကိုယ်ပိုင်အုပ်ချုပ်ခွင့်ရဒေသစီမံအုပ်ချုပ်ရေးအဖွဲ့ဥက္ကဋ္ဌ ဦးအာကာလင်းနှင့် ဒေသစီမံအုပ်ချုပ်ရေးအဖွဲ့ဝင်များ၊ ရှမ်းပြည်နယ်ပညာရေးမှူးရုံးမှတာဝန်ရှိသူများ၊ ဒေသအဆင့် ဌာနဆိုင်ရာ အကြီးအကဲများ၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် မြို့နယ်စီမံအုပ်ချုပ်ရေးအဖွဲ့ဝင်များ၊ မြို့နယ်အဆင့် ဌာနဆိုင်ရာတာဝန်ရှိသူများ၊ ကျောင်းအုပ်ကြီးနှင့် ကျောင်းဆရာ/ဆရာမများ၊ မိဘဆရာအသင်းနှင့် ကျောင်းအကျိုးတော်ဆောင်များ၊ ကျောင်းသား/ကျောင်းသူများနှင့် ဒေသခံပြည်သူများ တက်ရောက်ခဲ့ကြသည်။
ရှေးဦးစွာ ဓနုကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ဥက္ကဋ္ဌ ဦးအာကာလင်းနှင့် တာဝန်ရှိသူများက ကျောင်းဆောင်သစ်အား ဖဲကြိုးဖြတ်ဖွင့်လှစ်ပေးခဲ့ကြပြီး ကျောင်းဆောင်သစ် ဆောက်လုပ်ထားရှိမှု အခြေအနေများကို လှည့်လည်ကြည့်ရှုစစ်ဆေးခဲ့ကြသည်။
ဆက်လက်၍ အခမ်းအနားဒုတိယပိုင်းအစီအစဉ်အား အခြေခံပညာအထက်တန်းကျောင်း(ကျုံး)ခန်းမ၌ ကျင်းပပြုလုပ်ခဲ့ရာ ဓနုကိုယ်ပိုင်အုပ်ချုပ်ခွင့်ရဒေသစီမံအုပ်ချုပ်ရေးအဖွဲ့ဥက္ကဋ္ဌ ဦးအာကာလင်းက အဖွင့်အမှာစကားပြောကြားရာတွင် “ယနေ့ပြည်ထောင်စုသမ္မတမြန်မာနိုင်ငံတော်၊ နိုင်ငံတော်စီမံ အုပ်ချုပ်ရေးကောင်စီသည် ဦးတည်ချက် (၁၂) ရပ်ချမှတ်ထားပြီး လူမှုရေးဦးတည်ချက်တစ်ရပ်ဖြစ်သည့် ခေတ်မီဖွံ့ဖြိုးတိုးတက်သော ဒီမိုကရေစီ နိုင်ငံတော်တည်ဆောက်ရေးအတွက် လိုအပ်သည့်လူ့စွမ်းအားအရင်းအမြစ်များ မွေးထုတ်နိုင်ရန် ဘက်စုံပညာရေး ကဏ္ဍမြှင့်တင်ရေးကို အရေးကြီးကဏ္ဍတစ်ရပ်အဖြစ် အကောင်အထည်ဖော်ဆောင်ရွက်လျက်ရှိပါကြောင်း၊ ထို့ကြောင့် ယခုစာသင်နှစ်မှာ အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်း(ကျုံး)တွင် RCC (သုံးထပ်ဆောင်)ကျောင်းဆောင်သစ်ကို ၂၀၂၃-၂၀၂၄ဘဏ္ဍာရေးနှစ်၊ ပညာရေးဝန်ကြီးဌာန၊ အခြေခံပညာဦးစီးဌာန၊ ငွေလုံးငွေရင်းရန်ပုံငွေဖြင့် ငွေကျပ် (၈၁၅ ဒသမ ၆၃၂)သန်း တန်ဖိုးရှိ အလျား (၁၇၄)ပေ၊ အနံ (၃၂)ပေ၊ RCC သုံးထပ် ကျောင်းဆောင်သစ်ကို “ပွင့်သစ်ဝေ”ဆောက်လုပ်ရေးကုမ္ပဏီမှ တာဝန်ယူပြီး ၂၀၂၃ခုနှစ်၊ ဇူလိုင်လ ၉ ရက်နေ့မှ စတင်ဆောင်ရွက်ခဲ့ရာ ၂၀၂၄ခုနှစ်၊ မတ်လ ၂၀ ရက်နေ့တွင် လုပ်ငန်းများအားလုံးပြီးစီးသွားပြီဖြစ်၍ ကျောင်းသား/ ကျောင်းသူများ အဆင်ပြေစွာဖြင့် ပညာသင်ကြားခွင့်ရရှိတော့မှာဖြစ်တဲ့အတွက် အထူးဝမ်းသာဂုဏ်ယူရပါကြောင်း” ပြောကြားသည်။
ထို့နောက် “ပွင့်သစ်ဝေ”ဆောက်လုပ်ရေးကုမ္ပဏီမှ တာဝန်ခံတစ်ဦးက ကျောင်းဆောင်သစ်နှင့်သက်ဆိုင်သည့် စာရွက်စာတမ်းများအား လွှဲပြောင်းပေးခဲ့ရာ ဓနုကိုယ်ပိုင်အုပ်ချုပ်ခွင့်ရဒေသ၊ ဒေသပညာရေးမှူးဦးခင်ဇော်ထွန်းမှ လက်ခံရယူခဲ့ပြီး ဂုဏ်ပြုမှတ်တမ်းလွှာပြန်လည်ပေးအပ်ခဲ့သည်။ယင်းနောက် အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်း(ကျုံး)မှ ကျောင်းအုပ်ဆရာမကြီးက ကျောင်းဆောင်သစ်လွှဲပြောင်းပေးအပ်ပွဲ အထိမ်းအမှတ်အလံများကို သက်ဆိုင်ရာပုဂ္ဂိုလ်များထံသို့ နေရာအရောက်လိုက်လံပေးအပ်ခဲ့ပြီး ကျောင်းဆောင်သစ် ဖွင့်ပွဲနှင့်ပတ်သက်၍ ကျေးဇူးတင်စကားပြန်လည်ပြောကြားခဲ့ကြောင်း သိရသည်။
ရဲထက်ဦး
https://t.me/MyanmarNationalPost
No comments:
Post a Comment