မိုင်းဖြတ် ၊ ဇူလိုင် ၂၉
ရှမ်းပြည်နယ်(အရှေ့ပိုင်း) မိုင်းဖြတ်မြို့နယ်တွင် မျိုးကောင်းမျိုးသန့်တိရစ္ဆာန်များ၏ အထွက်နှုန်းတိုးတက်ကောင်းမွန်လာစေရန် ရည်ရွယ်၍ တိရစ္ဆာန်အစာပင်စိုက်ပျိုးခြင်းနှင့် မြက်ချဉ်ဖတ်ပြုလုပ်နည်း အသိပညာပေးခြင်းကို ယမန်နေ့က ဝမ်မိုင်ရပ်ကွက် နွားမွေးမြူရေးခြံ၌ ဆောင်ရွက်ခဲ့သည်။
ရှေးဦးစွာ မြို့နယ်မွေးမြူရေးနှင့်ကုသရေးဦးစီးဌာနမှ ဒေါက်တာထွန်းဇော်ဝင်းက တိရစ္ဆာန်အစာပင်စိုက်ပျိုးခြင်းနှင့် မြက်ချဉ်ဖတ်ပြုလုပ်နည်းကို လက်တွေ့ကျကျကျင့်သုံးပါက ရရှိမည့်အကျိုးကျေးဇူးများကို ရှင်းလင်းပြောကြားခဲ့သည်။ ထို့နောက် နွားစာဖတ်ပြုလုပ်ရာတွင် လိုအပ်သည့် မြေနေရာ၊ ချဉ်ဖတ်စာ၊ ချဉ်ဖတ်ထည့်ရန်ပြင်ဆင်ပုံ၊ တွက်ချက်နည်းအခြေခံ၊ နေပီယာမြက်စိုက်ပျိုးထားရှိမှုများနှင့် ဆောင်ရွက်ပုံနည်းလမ်းများ၊ ယူရီးယားကောက်ရိုးပြုပြင်ကျွေးမွေးခြင်းဆိုင်ရာ နည်းပညာများကိုသရုပ်ပြခြင်းနှင့် ကောက်ရိုးများစနစ်တကျထားရှိနိုင်ရေး ပညာပေးဆောင်ရွက်ခဲ့ကြောင်း သိရသည်။
ဆက်လက်၍ တာဝန်ရှိသူများက နွားစာချဉ်ဖတ်ပြုလုပ်နည်း၊ ကောက်ရိုးကို ယူရီးယားဖြင့် ပြုပြင်ကျွေးမွေးခြင်း အသိပညာပေးလက်ကမ်းစာစောင်များကို ဖြန့်ဝေးပေးခဲ့ပြီး အဆိုပါပညာပေးဆောင်ရွက်ရာသို့ မြို့နယ်အတွင်းရှိ တိရစ္ဆာန်မွေးမြူရေးလုပ်ငန်းရှင် (၁၁)ဦး တက်ရောက်ခဲ့ကြကြောင်း သိရသည်။
သန်းထွန်းအေး
https://t.me/MyanmarNationalPost
No comments:
Post a Comment