အ.ထ.က(နတ်စင်ကုန်း)၌ အားကစားနှင့်လူငယ်ရေးရာအသိပညာပေး ဟောပြောပွဲကျင်းပ

ကော့မှူး  ၊ ဩဂုတ် ၉

လူငယ်လူရွယ်များ အားကစားဆိုင်ရာအသိပညာနှင့် ဗလငါးတန်ဖွံ့ဖြိုးပြီး လူတော်လူကောင်းများပေါ်ထွန်းလာစေရန်ရည်ရွယ်၍ အားကစားနှင့်လူငယ်ရေးရာအသိပညာပေးဟောပြောပွဲကို ရန်ကုန်တိုင်းဒေသကြီး တွံတေးခရိုင် ကော့မှူးမြို့နယ် အခြေခံပညာအထက်တန်းကျောင်း(နတ်စင်ကုန်း)၌ ဩဂုတ်လ ၇ ရက်နေ့နံနက်က ကျင်းပခဲ့ကြောင်းသိရသည်။

ဦးစွာမြို့နယ်ပညာရေးမှူး ဒေါ်နုနုကြည်က အဖွင့်အမှာစကားပြောပြီး ကော့မှူးမြို့နယ်စီမံအုပ်ချုပ်ရေးအဖွဲ့ အဖွဲ့ဝင်(၂) ဦးမြင့်ဦးက အနာဂတ်၏ကြယ်ပွင့်များဖြစ်သော ကျောင်းသား/ကျောင်းသူ လူငယ်များဗလငါးတန်ဖွံ့ဖြိုးပြီးထက်မြက်သော လူငယ်လူရွယ်များဖြစ်လာစေရန်ရည်ရွယ်၍ လူငယ်ရေးရာအသိပညာပေးဟောပြောပွဲကို ပြုလုပ်ပေးနေခြင်းဖြစ်ကြောင်းနှင့် လူငယ်ရေးရာဆိုင်ရာများကိုလည်းကောင်း၊ မြို့နယ်မီးသတ်ဦးစီးဌာနမှ မြို့နယ်ဦးစီးမှူး ဦးပြည့်ဖြိုးအောင်က မီးဘေးအန္တရာယ်ကြိုတင်ကာကွယ်ရေးလုပ်ငန်းများကိုလည်းကောင်း၊ မြို့နယ်အားကစားနှင့်ကာယပညာဦးစီးဌာနမှ မြို့နယ်ဦးစီးမှူး ဦးအောင်နိုင်ဦးက အားကစားဆိုင်ရာသိကောင်းစရာများကိုလည်းကောင်း၊ မြို့နယ်ပြည်သူ့ကျန်းမာရေးဦးစီးဌာနမှ ဝမ်းပျက်ဝမ်းလျှောရောဂါကြိုတင်ကာကွယ်နိုင်ရေးများကိုလည်းကောင်း၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ဇာခြည်စိမ့်က‌ ကျောင်း သား /ကျောင်းသူ လူငယ်လူရွယ်များအနေဖြင့် နောင်တစ်ချိန်တွင် တိုင်းပြည်၏တာဝန်များကို ပခုံးပြောင်းထမ်းဆောင်ကြမည့်သူများဖြစ်သည့်အတွက် အနာဂတ်မျိုးဆက်သစ်များ အသိပညာဗဟုသုတများပြည့်စုံကြွယ်ဝပြီး ကာယ၊ ဉာဏ၊ စာရိတ္တ၊ မိတ္တ၊ ဘောဂစသည့် ဗလငါးတန်ပြည့်စုံစေရန်နှင့် လူငယ်နှင့်စာပေခေါင်းစဉ်များ ဟောပြောခဲ့ကြောင်းသိရသည်။

ထို့နောက် ကျောင်းသား/ကျောင်းသူများ အသိပညာတိုးပွားစေရေးအတွက် မူးယစ်ဆေးဝါးအန္တရာယ်အသိပညာပေးနံရံကပ်စာစောင်များ၊ အမျိုးသမီးအကြမ်းဖက်မှုပပျောက်ရေးအသိပညာပေး နံရံကပ်စာစောင်များ၊ ကလေးအလုပ်သမားပပျောက်ရေးနံရံကပ်စာစောင်များနှင့် သုတ/ရသစာအုပ်စာစောင်များ ပြသထားရာကျောင်းသား/ကျောင်းသူများ စိတ်ပါဝင်စားစွာကြည့်ရှုနေကြကြောင်းသိရသည်။

ကျော်သူရ (ကော့မှူး)

https://t.me/MyanmarNationalPost