(၂၅) ကြိမ်မြောက် ငွေရတုအထိမ်းအမှတ် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ပြိုင်ပွဲများ နေပြည်တော်၌ ကျင်းပလျက်ရှိ

နေပြည်တော်၊ အောက်တိုဘာ ၁၅

ပြည်ထောင်စုနယ်မြေ၊ နေပြည်တော်တွင် (၂၅)ကြိမ်မြောက် ငွေရတုအထိမ်းအမှတ် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကြီးကို ယမန်နေ့နံနက်ပိုင်းက မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၂ Signing Room ၊ Banquet Hall ၊ Plenary Hall ၊ News Briefing Room တို့တွင်လည်းကောင်း၊ သာသနာရေးနှင့်ယဉ်ကျေးမှုဝန်ကြီးဌာန ယဉ်ကျေးမှုရတနာခန်းမ၊ လေ့ကျင့်ရေးဇာတ်ရုံ၊  နေပြည်တော် အမျိုးသားစာကြည့်တိုက်ခန်းမ၊ နေပြည်တော်အမျိုးသားပြတိုက်၊ နေပြည်တော် စည်ပင်သာယာကော်မတီ လေဟာပြင် ကဇာတ်ရုံတို့တွင်လည်းကောင်း အသီးသီးကျင်းပလျက်ရှိသည်။

အဆိုပါပြိုင်ပွဲများအနက် စောင်း၊ ပတ္တလား၊ နှဲ ၊ ပလွေ၊ အတီးပြိုင်ပွဲများကို အမျိုးသားပြတိုက်ခန်းမ၌ ကျင်းပရာ စောင်းပြိုင်ပွဲ(ပထမ)ရက်နေ့တွင် အဆင့်မြင့်ပညာ (အမျိုးသား)၊ အဆင့်မြင့်ပညာ (အမျိုးသမီး)၊ အခြေခံအသက် ၁၅-၂၀ (အမျိုးသား)၊ ဝါသနာရှင် ပထမတန်း(အမျိုးသား)၊ ဝါသနာရှင် ပထမတန်း (အမျိုးသမီး) ပြိုင်ပွဲဝင် ပညာရှင်များက မဲပေါက်သီချင်းများဖြစ်သည့် ပန်းဟေဝန်(ယိုးဒယား)၊ ရွှန်းရွှန်းမြ(သီချင်းခံ)၊ မှိုင်းရိပ်ကယ်တည့် (ကြိုး)၊ ထောင်ရောင်နေ(သီချင်းခံ)၊ ဇမ္ဗူကျွန်းလုံး(သီချင်းခံ)စသည့် သီချင်းများဖြင့် ယှဉ်ပြိုင်လျက်ရှိကြောင်း သိရသည်။

တင်စိုးလွင်

Join - https://t.me/MyanmarNationalPost