သာစည် ၊ အောက်တိုဘာ ၂၃
မိတ္ထီလာခရိုင်၊ သာစည်မြို့နယ်၊ ကျေးလက်လမ်းဖွံဖြိုးရေးဦးစီးဌာနမှ မိုးသည်းထန်စွာရွာသွန်းမှုကြောင့် ပျက်စီးမှုများဖြစ်ပေါ်ခဲ့သော မြင်းဒိုက်-ကမ္ဘားနီ-စေတီတောင်-ဆင်တောင်-ခွေးရုပ်လမ်းအား မိတ္ထီလာခရိုင် လက်ထောက်ညွှန်ကြားရေးမှူး(မြို့ပြ) ဒေါ်နှင်းနှင်းအိလှိုင်၊ သာစည်မြို့နယ် ဦးစီးအရာရှိ(မြို့ပြ) ဒေါ်ပိုပိုချစ်တို့သည် အောက်တိုဘာ ၂၁ ရက်နေ့ နံနက်ပိုင်းက သွားရောက်ကြည့်ရှု စစ်ဆေးခဲ့ကြကြောင်း သိရသည်။
သာစည်မြို့နယ်တွင် စက်တင်ဘာလ ၁၀ ရက်နေ့မှ စက်တင်ဘာလ ၁၃ ရက်နေ့အထိ မိုးအဆက်မပြတ်သည်းထန်စွာရွာသွန်းခဲ့ရာ စက်တင်ဘာ ၁၂ ရက်နေ့က တောင်ပေါ်ဒေသကျေးရွာများဖြစ်သည့် မြင်းဒိုက်-ကမ္ဘားနီ-စေတီတောင်-ဆင်တောင်-ခွေးရုပ်ကျေးရွာတို့ ဆက်သွယ်သွားလာသည့် လမ်းအရှည် (၈/၀) မိုင် ကျောက်လမ်းသည် တောင်ကျချောင်းရေ တိုက်စားမှုကြောင့် လမ်းသားပဲ့ကျခြင်း၊ တောင်ပြိုခြင်း၊ လမ်းပိုင်းပြတ်ခြင်း ပျက်စီးမှုများဖြစ်ပေါ်ခဲ့ရာ လတ်တလောသွားလာရေး အဆင်ပြေနိုင်စေရေးအတွက် ဒေသခံပြည်သူများနှင့်ပူးပေါင်း၍ သစ်ပင်ခြုံနွယ်များရှင်းလင်းခြင်း၊ တောင်ပြိုမြေများ ဖယ်ရှားခြင်းလုပ်ငန်းများ ဆောင်ရွက်ထားရှိမှုကိုကြည့်ရှုစစ်ဆေးခဲ့ပြီး ထောက်ပံ့ပေးငွေများ ပေးအပ်ခဲ့ကာ တည်ဆောက်ရေးလုပ်ငန်းများဆက်လက် ဆောင်ရွက်သွားနိုင်ရေးအတွက် မြေပြင်အခြေအနေများကို ကွင်းဆင်းကြည့်ရှုခဲ့ကြကြောင်း သိရသည်။
အဆိုပါ မြင်းဒိုက်-ကမ္ဘားနီ-စေတီတောင်-ဆင်တောင်-ခွေးရုပ်လမ်းသည် ကျေးရွာ(၉)ရွာ၊ အိမ်ခြေ(၇၆၂) အိမ် လူဦးရေ(၃၆၂၇) ဦးတို့ ဆက်သွယ်သွားလာနေသော လမ်းဖြစ်ကြောင်း သိရသည်။
https://t.me/MyanmarNationalPost
No comments:
Post a Comment